ཉེ་ལམ་ཨ་རིའི་གཞུང་འཛིན་གསར་བས། ཨ་རིའི་རླུང་འཕྲིན་ཁང་དང་ཨེ་ཤེ་ཡ་རང་དབང་རླུང་འཕྲིན་ཁང་གཉིས་ཀྱི་འགྲོ་གྲོན་མཚམས་འཇོག་བྱས་ཏེ། གསར་ཁང་གཉིས་ཀྱི་ལས་མཚམས་བཞག་པ་ནི་ཡིད་སྐྱོ་ཞིང་བློ་ཕམ་དགོས་པའི་གནས་སྟངས་ཤིག་ཆགས་ཡོད་སྟབས། བོད་ཀྱི་གསར་འགོད་མཐུན་ཚོགས་ཀྱིས་ཨ་རིའི་རླུང་འཕྲིན་ཁང་གཉིས་ཀྱི་འགོ་ལས་ཡོངས་ལ་གདུང་སེམས་མཉམ་སྐྱེད་ཞུ་རྒྱུ་དང་སྦྲགས། ཨ་རིའི་གཞུང་འཛིན་གསར་བས་ཨ་རིའི་རླུང་འཕྲིན་ཁང་དང་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གཉིས་ཀྱི་གསར་འགོད་རང་དབང་གི་ལས་དོན་རྣམས་འཕྲལ་དུ་གཉེར་ཆོག་པར་སྔར་རྒྱུན་བཞིན་མཐུན་འགྱུར་བཀའ་འཁྲོལ་སྦྱོར་སྤྲོད་ཡོང་བའི་འབོད་སྐུལ་ཞུ་རྒྱུ་ཡིན།
འཛམ་གླིང་ནང་དམངས་གཙོ་དང་རང་དབང་། དྲང་བདེན། འགྲོ་བ་མིའི་ཐོབ་ཐང་། སྨྲ་བརྗོད་རང་དབང་དང་གསར་འགོད་རང་དབང་སོགས་ལ་རྡོག་རོལ་གཏོང་མཁན་གྱི་དམར་ཤོག་གཞུང་དང་སྲིད་དབང་སྒེར་གཅོད་པ་དག་གིས། གང་ན་རང་དབང་དང་དམངས་གཙོ། གསར་འགོད་རང་དབང་ཡོད་ཚེ། དེ་ལ་སྐྱུག་བྲོ་བའི་གདུང་ལེན་དང་ཁ་གཏད་གཅོག་ཐབས་ཀྱི་སྦྱོར་བ་སྣ་ཚོགས་ཤིག་རྩོམ་མུས་ཡིན་ཁར། འདས་པའི་ལོ་ངོ་བཅུ་ཕྲག་མང་པོའི་རིང་རྒྱ་ནག་གཞུང་གིས་བོད་པའི་སྤྱི་ཚོགས་སྤྱི་དང་བྱེ་བྲག་ཏུ་ཨ་རིའི་རླུང་འཕྲིན་ཁང་དང་ཨེ་ཤེ་ཡ་རང་དབང་རླུང་འཕྲིན་ཁང་གཉིས་ལ་དངོས་ཤུགས་བརྒྱུད་གསུམ་གྱི་ཐོག་ནས་གནོན་ཤུགས་སྤྲད་དེ། རླུང་འཕྲིན་ཁང་དེ་གཉིས་ཀྱི་གསར་འགོད་རང་དབང་འགོག་ཐབས་བྱས་ཡོད་ལ། ཉེ་ལམ་ཡང་རླུང་འཕྲིན་ཁང་དེ་གཉིས་སྒོ་རྒྱག་རྒྱུ་ཡིན་པའི་གནས་ཚུལ་བྱུང་མ་ཐག་ཏུ་རྒྱ་ནག་དམར་ཤོག་ཚོགས་པའི་མགྲིན་ཚབ་ལྟ་བུའི་གཞུང་འབྲེལ་བརྒྱུད་ལམ་ཁག་གིས་ཨ་རིའི་ཐག་གཅོད་དེར་དགའ་བསུ་བྱས་པ་དང་ལྷན་དུ། ཨེ་ཤེ་ཡ་རང་དབང་རླུང་འཕྲིན་ཁང་དང་ཨ་རིའི་རླུང་འཕྲིན་ཁང་གཉིས་ཀྱི་འདས་པའི་བྱས་རྗེས་མང་པོ་ཞིག་ལ་འགྲེལ་ལོག་བརྒྱབ་སྟེ་གང་ཐུབ་ཀྱིས་ནག་བསུབ་གཏོང་ཐབས་བྱས་ཡོད།
ཕྱི་ལོ་ ༡༩༩༠ ནང་ཨ་རིའི་རླུང་འཕྲིན་ཁང་དང་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གསར་འཛུགས་བྱས་པ་ནས། རླུང་འཕྲིན་ཁང་འདི་གཉིས་ཀྱིས་རྒྱ་ནག་གཞུང་གི་དྲག་གནོན་འོག་གནས་པའི་བོད་མི་ཚོར་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེ་མཛད་འཕྲིན་གྱི་དབུས་པའི་བོད་མིའི་སྒྲིག་འཛུགས་ཀྱི་སྲིད་ཇུས་དང་ཕྱག་ལས་གནང་ཕྱོགས། བཙན་བྱོལ་བོད་མིའི་གནས་སྟངས། ད་དུང་འཛམ་གླིང་གི་ཆབ་དཔལ་རིག་གསུམ་གྱི་འགྱུར་ལྡོག་སོགས་དུས་ནས་དུས་སུ་རྒྱང་སྲིང་གནང་ཐུབ་ཡོད་པ་མ་ཟད། འཛམ་གླིང་ནང་ཆེས་དམ་དྲག་ཆེ་བའི་རྒྱ་ནག་གི་སྡུག་སྦྱོང་དྲག་པོའི་སྲིད་ཇུས་འོག དམྱལ་བ་མི་ཡུལ་དུ་ལྷུང་བ་ལྟ་བུའི་བོད་ནང་གི་མི་མང་པོའི་དངོས་ཡོད་གནས་ཚུལ་རྒྱལ་སྤྱིའི་སྟེང་འགྲེམས་སྤེལ་བྱེད་ཐུབ་ཡོད།
ལྷག་པར་དུ་བོད་མི་རིགས་ཤི་གསོན་གྱི་འགག་རྩ་སྟེ། རླུང་འཕྲིན་ཁང་འདི་གཉིས་ཀྱིས་བོད་སྐད་བོད་ཡིག་གཙང་མའི་ཐོག་ནས་བོད་ཀྱི་རིག་གཞུང་དང་ལོ་རྒྱུས། རྩོམ་རིག་དང་འབྲེལ་བའི་དཔྱད་གླེང་དང་ཉིན་རེའི་གསར་འགྱུར་སོགས་རྒྱུན་ཆད་མེད་པར་རྒྱང་སྲིང་ཞུས་ཏེ། བོད་ཀྱི་སྐད་ཡིག་རིག་གཞུང་སྲུང་སྐྱོབ་དང་ཉར་ཚགས་ཀྱི་ཕྱག་ལས་རླབས་ཆེན་གནང་ཡོད། དེར་བརྟེན། ཨ་རིས་རླུང་འཕྲིན་ཁང་འདི་གཉིས་ཀྱི་ལས་མཚམས་བཞག་པ་ནི། བོད་ཀྱི་གསར་འགོད་མཐུན་ཚོགས་ལ་མཚོན་ན་ཧ་ཅང་བློ་འགྱོད་སྐྱེ་ཡུལ་ཞིག་ཏུ་གྱུར་ཡོད་ལ། དམིགས་བསལ་བོད་མིའི་མང་གཙོའི་སྤྱི་ཚོགས་ཀྱི་ཀ་ཆེན་གཉིས་ས་ལ་འགྱེལ་བ་ཡིན་པས། བོད་མི་ཚང་མས་འཕྱར་བ་གྲུ་འདེགས་བྱས་ཏེ་འབྲེལ་ཡོད་ཨ་རིའི་མགོ་ཁྲིད་ཚོར་རླུང་འཕྲིན་ཁང་འདི་གཉིས་སླར་གསོ་ཡོང་ཐབས་ཀྱི་ཞུ་སྐུལ་གནང་རོགས་ཞེས་འབོད་སྐུལ་ཞུ་རྒྱུ་ཡིན།
གང་ན་མང་གཙོ་ཡོད་ན། དེ་ན་གསར་འགོད་རང་དབང་ཡོད་ལ། གསར་འགོད་རང་དབང་ཡོད་པའི་མང་གཙོའི་སྤྱི་ཚོགས་ནི་མང་གཙོའི་སྤྱི་ཚོགས་ཚད་མཐོ་ཤོས་དེ་ཡིན་པར་ངོས་འཛིན་ཞུ་ཆོག་པས། བོད་ཀྱི་གསར་འགོད་མཐུན་ཚོགས་ཀྱིས་འཛམ་གླིང་ཡུལ་གྲུ་གང་སར་བཞུགས་པའི་རྒྱལ་སྤྱིའི་གསར་འགོད་མཐུན་ཚོགས་ཀྱི་སྒྲིག་འཛུགས་ཁག་དང་། རྒྱལ་ཁབ་སོ་སོའི་གསར་འགོད་པ་རྣམ་པ། དམིགས་བསལ་ཨ་རིའི་ནང་བཞུགས་པའི་གསར་འགོད་པ་ཚོས། ཨ་རིའི་རླུང་འཕྲིན་ཁང་འདི་གཉིས་ཀྱི་ལས་དོན་མུ་མཐུད་གཉེར་ཐུབ་ཐབས་སུ་ཨ་རིའི་གཞུང་ལ་འབོད་སྐུལ་གནང་བའི་རེ་བ་ཞུ་རྒྱུ་ཡིན། གསར་འགྱུར་ལས་རིགས་ནི་ང་ཚོ་ཐུན་མོང་གི་ཆེད་ལས་ཤིག་དང་ལྷག་པར་མང་གཙོའི་སྤྱི་ཚོགས་ཀྱི་གྲུབ་ཆ་མེད་དུ་མི་རུང་བ་ཞིག་ཡིན་པ་སྨྲོས་མི་དགོས་པས། ཇི་ཙམ་དམངས་གཙོ་དང་རང་དབང་། དྲང་བདེན། འདྲ་མཉམ་སོགས་གནས་དགོས་ན། དེ་ཙམ་གྱིས་གསར་འགོད་རང་དབང་གནས་དགོས་པའི་གནས་ལུགས་ནི་ཐུགས་ཡངས་ཚང་མས་མཁྱེན་གསལ་ཡིན།
མཐར། ཨ་རིའི་གཞུང་འཛིན་གསར་བས་རླུང་འཕྲིན་ཁང་འདི་གཉིས་ཀྱི་གཟེངས་སུ་ཐོན་པའི་ཕྱག་ལས་མུ་མཐུད་གཉེར་ཆོག་པའི་ཐག་གཅོད་གང་མགྱོགས་ལེན་རོགས་ཞེས་ཞུ་རྒྱུ་ཡིན།
